අපේ මිනිස්සුන්ගේ මනුස්සකම

මම උඩරට,රජ රට,පහත රට වගේ රට වලට ඇරුනහම පිටරටකට නම් ගිහිල් නැහැ.හැබැයි චිත්‍රපටි බලල නම් පිට රටවල් ගැන හුගක් දේවල් ඉගෙන ගන්නවා. මේ චිත්‍රපටියේ නම නම් මට හරියට මතක නැහැ.හැබැයි සිද්ධිය නම් මේකයි.

සුද්දෙක් ගමනක් යන අතර මගදී මිනිහගේ වාහනේ කැඩෙනව.කාගෙන් වත් උදවුවක් ලැබෙන්නෙ නැහැ. පස්සෙ ලගපාත හිටපු  කොල්ලෙකුට කථා කරලා කියනවා වාහනේට පොඩි තල්ලුවක් දාන්න පුලුවන්ද කියලා.කියපු ගමන් මූ අහපි මට කීයක් ගෙවනවාද කියලා.පස්සෙ අර මිනිහා ගාණක් කියනවා.ඌ ඒ ගාණට කැමති වෙන්නෙ නැහැ.අන්තිමට ඌ කියන ගාන ගෙවලා වාහනේට තල්ලුවක් දාගෙන ස්ටාට් කර ගෙන ගමන යනවා. ඒ සිදුවීම චිත්‍රපටියෙ තියන පුංචිම පුංචි සිද්ධියක්.නමුත් මටනම් ඒකතමා ඒකෙ තිබුනු වැදගත්ම සිද්ධිය.ඒක ඒ කොල්ලගේ හැටිද නැත්නම් සමස්ථ බටහිර සමාජයේම හැටිද කියන්න තරම් මට අවබෝධයක් නැහැ.අහලා තියන විදියට සමස්ථ බටහිර සමාජයේම හැටි ඔහොම තමයි.හැම දේම තීරණය වෙන්නෙ මුදලට.

නිකමට හිතන්න ඔය දේම අපේ රටේදි සිද්ද උනානම් මොකක් වෙයිද? “මචං මොකක්ද අවුල”,”ඇයි මල්ලී මොකක්ද කේස් එක”,”මහත්තය මොකක්ද වෙන්න ඕන” කියල මිනිස්සු කී දෙනෙක් අහයිද? අපේ මිනිස්සුන්ගෙ මොන වැරදි තිබුනත් කෙනෙකුට කරදරයක් වෙච්ච වෙලාවට පැනලා උදවු කරන එක අපේ මිනිස්සුන්ගෙ සිරිත.

මේක හොදින්ම දෙක්කෙ පහුගිය සුනමියෙදී.වර්තමානයෙදිත් ඒක දකින්න තියනවා.තමන් නොකා හරි කන්න නැති කෙනෙකුට බත් පතක් දෙන මිනිස්සු මේ රටේ ඕන තරම් ඉන්නවා.කරදරේකදී උදවු වෙනවා කියන එක අපේ මිනිස්සුන්ගේ ජාන වලම තියන දෙයක්.ඒත් අර කොල්ලා වගේ මිනිස්සුත් අපේ රටෙත් නැතුවා නෙවෙයි.හැබැයි බොහොම අතලොස්සයි.අවාසනාව කියන්නෙ රටේ ප්‍රසිද්ධ වෙන්නෙ උන්ගෙ වැඩ තමා.